Tunjuk ajar tegur sapo penganten pada adat jambi

Assalamu'alaikum Warahmatullahi Wabarakatuh

Datuk- datuk, nenek mamak, tuo-tuo tengganai, Alim ulama, Cerdik pandai. Bapak- bapak, Ibu-ibu dan saudara-saudara para hadirin yang kami muliokan.

pado hari nang elok, ketiko nang baikko bagi kami selaku orang tuo nak memberi tunjuk ajar tegur sapo kepado anak kami nang baduo laki biniko. karno bagi nang tuo-tuoko sudah menjadi utang, untuk mengarahkan, mengajum, serta menunjuk ajar, menegur saponyo, anak buah anak ponakan nang akan betunak berumah tanggo.

bak kato pepatah adat kito semakin tau makin ditunjuk, semakin cerdik makin di ajar, semakin baik semakin ditegur, semakin elok semakin disapo.

mako kini dengarlah baik-baik tunjuk ajar tegur sapo kamiko.

yang pertamo:

menurut adat jambi yang mengatokan, sekecik-kecik sematung dirimbo, bilolah babuah itulah tuo namonyo. oleh sebab itu kamu baduoko, harus menganjak laku, mangubah pakuo, menganjak tutur, mengubah baso.

apo yang dikatokan oleh adat kito, anjak laku ubah pakuo, anjak tutur ubah baso itu, iolah laku perangai kamu nang sudah-sudah ko, kareno kamuko berasal dari bujang gadis, mako perangai bujang tinggallah dibujang, jangan dibawak lagi dalam maso babiniko, sebaliknyo perangai gadis tinggallah di gadis, jangan dibawak lagi kemaso balakiko.

Dan nang dimaksud kami anjak tutur ubah baso, iolah apo baso bini disanak memannyo, kalu pakcik basonyo pakcik pulak baso kito selaku lakinyo dan begitu pula sebaliknyo, selaku bini, harus menyesuaikan dengan baso lakinyo.

Yang keduo

Khusu kepado anak menantu kami:

Pulan Bin Pulan

Untuk kau ketahui sebagai suami yang baik, hendaklah selalu memperhatikan hak dan kewajiban serto tanggung jawab terhadap istri. mako terhitung sejak dilaksanokannyo ijab kabul akad nikah antaro kamu baduo laki biniko, mako bearalihlah tangggung jawab dari orang tuonyo kepado suaminyo.

bersambung.....

Tweet